Честитки за нашето ЕДИНСТВО; честитки за нашата УПОРНОСТ; затоа што со тоа УСПЕАВМЕ да го добиеме заслуженото внимание од институциите, пратениците во Собрание и од Премиерот и да дојдеме до КОМПРОМИС кој ги задоволува нашите барања; не го нарушува системот, а сепак ги штити интереситена сите ученици, напиша на својот фејсбук профил лидерот на Сојузот на средношколци, Бенди Ходаи.
Ние не баравме, како што не обвинуваа – да не учиме. Ние не баравме, како што некои тврдеа – да не полагаме. Баравме да бидеме слушнати, баравме промени кои ќе соодветствуваат на реалните услови во кои се изведува наставата, додава Ходаи.
Денеска премиерот Зоран Заев и лидерот на средношколците Ходаи, објавија дека е најдено решение за полагање на државната матура. Ќе се полагаат два екстерни предмети, два интерни предмети, ќе се формира работна група од Бирото за развој на образованието и Сојузот на средношколци, во која ќе има и наставници, а ќе одлучува за кратење на програмите за екстерните испити и со неа ќе претседава претставник од Кабинетот на премиерот.
Полагањето се одложува за една недела – наместо на 29 мај, ќе биде на 5 јуни.
Вака накусо изгледа компромисното решение што е постигнато во преговорите меѓу Владата и Сојузот на средношколци, со што се затвора прашањето за тоа како ќе се полага држaвната матура годинава.
Премиерот Заев рече дека на ваков начин ќе се обезбеди овие матуранти да можат да конкурираат на универзитетите и тука и во странство, што е целта на државната матура.