Министерот за земјоделство на Хрватска, Томислав Толушиќ денеска донесе одлука за повлекување на Правилникот за фитосанитарна контрола на овошјето и зеленчукот увезени од држави што не се членки на ЕУ, со кој цените на инспекциите беа зголемени за над 22 пати, објавија хрватските медиуми.
Одлуката на Толушиќ следи по жестоките реакции на земјите од Западен Балкан, меѓу кои и Македонија, кои директно беа погодени со променатата одлука на Хрватска донесена минатиот месец.
Со правилникот се предвидуваше цената за инсепкцискиот надзор да изнесува по 2.000 куни (270 евра) за секој вид на зеленчук или овошје, што во пракса значеше дека еден камион кој во Хрватска внесува пет различни видови на земјоделски производи ќе мораше за инспекцијата да плати 10.000 куни (1.350 евра).
Министрите за земјоделство на Македонија, Босна и Херцеговина, Србија и Црна Гора на средба во понеделникот во Сараево побараа Загреб под итно да го повлече правилникот.
Четирите земји побараа Хрватска да ги прилагоди своите цени за инспекциска контрола со просечната цена во земјите членки на ЕУ и апелираа до Унијата да се вклучи во надминувањето на спорот.