Македонците сонуваат ново чудо и историски пласман на мундијалот, со овој наслов државната телевизија на Србија известува за вечерашната финална утакмица за европскиот бараж, меѓу Северна Македонија и Португалија. Иако вечерва играат и Полска и Шведска, РТС во својот текст нотира дека сепак сите очи ќе бидат вперени на стадионот „Драгао“ на кој Португалците ќе го пречекаат „ најголемото изненадување на овие квалификации“ Северна Македонија. Играчите се полни со самодоверба, мотивацијата не е проблем, пишува РТС, потсетувајќи на ветувањето од премиерот и министерот за надворешни работи, доколку се пласираат на мундијалот нив ќе ги чекаат 500 илјади евра и дипломатски пасоши за сите од екипата вклучувајќи го и селекторот.
Северна Македонија ја спречи Италија за Мундијалот 2022, ова е насловот на бугарскиот портал „Сега“ кој пишува дека за Италијанците неуспехот бил многу болен бидејќи ќе пропуштат второ светско првенство.
Македонската десетка за „Вијести“, пишува подгоричкиот весник наведувајќи дека македонските фудбалери овој натпревар го коментираaт како натпревар на нивниот живот.
„ Нашиот мотив е да направиме нешто големо за нас , за нашата земја, за навивачите..за нас е ова натпревар на сите времиња, натпревар над сите натпревари , за нас ова е финале“ изјавил фудбалерот Енес Барди.
Во Палермо се случи чудо, може ли и во Порто да се случи чудо над чудата, фудбалерите на Северна Македонија веруваат дека е се можно, пишува „ Вијесник“.
Хрватскиот „Јутарњи лист“ пренесувајќи ја изјавата на Роналдо , коментира „ Нервоза во пресрет со Македонија“.Кристијано Роналдо со Португалија ќе се обиде да ја прескокне Македонија и да се пласира на светското првенство во Катар. „ Јутарњи“ наведува „иако Португалците се фаворити на домашен терен, Македонците се со голем залет и доаѓаат на крилата на победата над актуелните европски прваци, Италијанците“. Роналдо прилично нервозно одреагирал на новинарско прашање дали ако Португалија не се пласира за мундијалот, дали тој ќе ја заврши репрезентативната кариера,тој одговорил дека Светско првенство не можело да се игра без Португалија и дека ова било прашање на „живот и смрт“.
Наспроти изјавата на Роналдо српски „Блиц“ пишува дека португалците сепак биле внимателни во пресрет на вечерашниот меч и немале дилема околу тоа дека со покажаната игра во Палермо, Mакедонците заслужувале да се таму.
Со сличен коментар настапуваат и дел од грчките медиуми. Додека на хартија тимот на Кристијано Роналдо е огромен фаворит, фактот што нивните противници ја покорија Италија во Палермо во четвртокот вечерта ,тимот на Северна Македонија го прави ова потенцијална кожа од банана. Европскиот првак Италија упати 32 шута на тој натпревар, но не можеше да ја пробие северномакедонската одбрана, наведуваат медиумите.
(М.Трпческа)