Под мотото „Не бараме ни слава ни авторски права за нашите идеи“ денеска се одржа промоцијата на новата политичка партија Алијанса за позитивна Македонија, чии основачи се екс-премиерот и доскорошен член на СДСМ Владо Бучковски, бизнис-моќникот Минчо Јорданов и новинарот на Капитал Љупчо Зиков.
Владо Бучковски во новинарска изјава кажа дека поделиле 15.000 пристапници, па откако ќе стигнат до некоја респективна бројка, ќе биде избран лидерот на партијата:
– Не сакав, бидејќи долги години бев истакнат социјалдемократ, јас да се истакнувам во преден план и да го контаминирам овој нов политички субјект. Во оваа иницијатива, ќе се промовираат многу млади. Во 30 општини, каде ќе отвориме канцеларии, сакаме да промовираме нови звучни имиња. Ние свесно постарите избираме да бидеме во втор план. Опозициски ќе дејствуваме, што е природно, и мислиме дека со нова енергија ќе внесеме многу за Македонија, изјави Бучковски.
На говорницата единствено од основачите Зиков се обрати, со порака:
-Околку името, треба да се преиспита политиката на бркање на датум за ЕУ и НАТО и да се свртиме самите кон себе. Наместо да чекаме странски инвестиции, домашните бизнисмени да отвараат фабрики.
Зиков вчера во интервју за НОВА изјави дека Алијансата има план за 100.000 вработувања, а и дека се расположени и отворени за коалиција со сите партии.
Бучковски пак вчера, во изјава за НОВА изјави дека на есен е можна коалиција, односно заеднички настап со ГРОМ, партијата на Стевче Јакимовски и Либералната партија на Ивон Величковски.
.