Пропадна иницијативата на опозицијата за уривање на Владата предводена од премиерот Зоран Заев.
По долгите паузи, Собранискиот спикер, Талат Џафери вечерва ја свика 53-тата седница на Собранието, за гласање на единствената точка на дневен ред – доверба на Владата.
– Дневниот ред не е изгласан. Поради фактот што не може да се отвори дебата, според деловникот околу иницијативата за гласање на доверба на Владата, имајќи предвид дека надминува времето, во ваква ситуација не ни останува ништо освен да констатираме дека на Владата не и е изгласана недоверба. Владата продолжува да работи во полниот состав. Констатирам дека седницата е завршена, рече собранискиот спикер Талат Џафери.
Во законодавниот дом беа присутни само пратеници од владејачкото мнозинство, но не и опозицијата која ја поднесе оваа иницијатива.
Џафери претходно најави дека има должност да ја свика седницата до полноќ без разлика дали има или нема кворум во Собранието.
Опозициските пратеници вечерва се повлекоа од Собранието, откако цел ден во законодавниот дом не се појави пратеникот од редовите на Движењето Беса, Кастриот Реџепи, кој на „Фејсбук“ порача дека е на безбедно. Потпретседателот на ВМРО – ДПМНЕ, Александар Николовски изјави дека опозициската коалиција бара брзи предвремени избори.
Според координаторот на пратеничката група на СДСМ, Јован Митревски владејачкото мнозинство е стабилно, кој најави негово зголемување.
Во текот на целиот ден во Собранието владееше тензична и напната атмосфера околу кворумот и мнозинството коешто го најавуваа опозициските пратеници.
Тензична и напната атмосфера во Собранието – Мицкоски го нема најавеното мнозинство