НОВА стапи во контакт со сопругата на притворениот новинар Томислав Кежаровски, кој од денеска стапи во штрајк со глад, за што е известена и Управата за санкции.
Како што изјави за НОВА, Марина Кежаровска и таа почнува да штрајкува со глад, во знак на поддршка на својот сопруг, но и поради безизлезноста на ситуацијата и неможноста на друг начин да му помогне.
Од Кривичниот суд информираат дека истрагата по случајот завршила на 16-ти овој месец а предметот е предаден на обвинителството.
Кежаровска смета дека ова е единствениот начин да се алармираат сите инститруции во државата и да се најде излез од апсурдната ситуација во која е нејзиниот сопруг.
За неа е нејасно зошто и покрај тоа што истрагата е завршена, со што Кежаровски не може да влијае врз сведоци, како што беше образложено во обвинителниот акт, тој се уште е во притвор.
Томислав Кежаровски, пред два месеци беше притворен во полициската акција „Ликвидација“ под сомнение дека во два текста што ги објавил пред пет години во магазинот „Репортер 92“ наводно го открил идентитетот на заштитениот сведок, иако тој тврдеше дека се работи за лажен сведок во овој случај.