Податоците од Државниот завод за статистика покажуваат зголемување од 0,1 % на индексот на трошоците на животот.
Во март оваа година, индексот на цените на мало, во однос на претходниот месец, изнесува 99,9 % а индексот на трошоците на животот 100.1 %.
Порастот на трошоците на животот е резултат на повисоките индекси на зеленчукот за 3,9 %, овошјето за 2,5 %, преработките од овошје и риба за 0,7 %, преработките од зеленчук и безалкохолните пијалаци за 0,2 %.
Пораст на индексите на трошоците на животот е забележан и кај лековите за 3,7 %, авионскиот превоз на патници за 2,8 %, нафтените деривати за 1,9 %, храната и пијалоците во рестораните и хотелите за 0,4 %.
Намалување на индексите на трошоците на животот во март 2013 година, во споредба со претходниот месец, има кај мастите, за 2,7 %, кај јајцата за 1,3 %, преработките од месо и другите прехранбени производи за 0,4 % и сувото овошје за 0,2 %.
Намалување на индексите на трошоците на животот е забележано и кај централното греење за домаќинствата за 13,8 %, сообраќајните средства за 1,5 %, обувките за 0,8 %, облеката за 0,6 %, течните горива и гасот за домаќинствата за 0,5 % и средствата за хигиена за 0,3 %.
Индексот на цените на мало во март 2013 година, во споредба со март 2012 година, бележи пораст од 1 %, а индексот на трошоците на животот бележи пораст од 3,1 %.