Еднакво учество на Ромите во македонското општество побара пратеникот и претседател ПЦЕР, Самка Ибраимовски.
Тој потенцира дека Ромите во Македонија живеат полошо од кога и да досега. Дури 85 проценти од нив се невработени и живеат во сиромаштија на работ на секоја нормална живеачка.
– Моите Роми ги враќаат од граници како да живеат во кафез од којшто излегување нема. Ромите во Македонија живеат во робовладетелско општество, а не во нормална демократска држава. Им се укинува социјалната помош без никаква причина, се бришат од евиденција на Агенцијата за вработување, а државата ги третира како граѓани од втор ред со дискриминација на секој чекор – изјави Ибраимовски.
Од тие причини ПЦЕР како најстара ромска политичка партија, го крева гласот преку медиумите за подобри услови за Ромите во сите сегменти од нашето секојдневно живеење..
– Тие што денес планираат да прават скапи прослави со скари и музика се „злосторници“ на сопствениот народ. Денес е денот кога треба секој Ром треба да го крене својот глас против диктатурата и дискриминацијата порача Ибраимовски.
Европската комисија денеска ги повика државите од ЕУ да вложат дополнителни напори за здружување, против дискриминација на Ромската популација. Во заедничка изјава на еврокомесарите за правда, Вивиан Рединг, и за социјални прашања, Ласло Андор, се вели дека подобрувањето на положбата на Ромите е еден од главните предизвици на ЕУ..
Комесарите соопштуваат дека во следните два месеца ЕК ќе го оцени напредокот врз националните програми за ромска интеграција.
Најголема забелешка во соопштението на ЕК е ставена на Бугарија и Романија каде секој четврти или петти новодојденец на пазарот на трудот е Ром.