Во сабота, 28 септември 2013 година, во Струмица ќе се одржи третата по ред манифестација „100 Илјади поети за промена“. Ова е настан кој е дел од глобалната манифестација 100 Thousand Poets for Change – меѓународна манифестација која годишно се оддржува во повеќе од 100 држави, меѓу кои е и Република Македонија.
Ова е манифестација која има за цел да се шири и да ги мобилизира сите поети ширум светот, а досега во Македонија се вклучуваат сите оние кои сакаат и имаат волја да бидат промената која сакаат да ја видат во светот или најмалку во себе, односно околу себе. За оваа година се закажани 575 настани, во точно 100 држави во светот.
Како дел од програмата во Струмица ќе се реализираат две поетски читања.
Во 16 часот во Старото забавитеште – локација која е добро позната за струмичани, ќе се одржи поетско читање наменето за средношколците од општина Струмица кои претходно се пријавија на отворениот конкурс, додека вечерното читање е наменето за поетите од цела држава кои со целосен ентузијам ја поддржуваат идејата и мисијата на самото движење.
Во 20 часот, во Центарот за култура „Антон Панов“ќе биде отворена изложбата на дизајнерските решенија за плакат за манифестацијата, на која со свои дела се пријавија дваесетина дизајнери од целата држава. По отворањето на изложбата ќе се одржи голем поетски хепенинг на поети од речиси сите градови во државава – поети кои со ентузијам ја поддржуваат идејата и мисијата на самото движење.
Оваа година за првпат ќе биде промовиран алманах „100 Илјади поети за промена I“во кој се застапени дел од поетите кои учествуваа на конкурсот за поезија.
Струмица е веќе третпат дел од ова глобално движење кое има за цел подигање на свеста кај граѓаните за проблемите со кои се соочуваме секојдневно. На оваа манифестација, поетите имаат единствена можност преку сопствената ангажирана поезија да проговорат за сите овие проблеми.