Постои итна потреба за придвижување на интеграцијата на Македонија и на Албанија во Европската Унија (ЕУ). Тактизирањето со ветото е сериозен безбедносен ризик за Балканот, оценија заменик-помошничката на секретарот за одбрана на САД, Лора Купер и министерката за одбрана, Славјанка Петровска во заедничкото интервју за „Гласот на Америка“, реализирано при посетата на македонската делегација на Вашингтон.
„Мислиме дека е неверојатно важно да се продолжи со дипломатските разговори за решавање на тоа прашање. Би го пофалила лидерството на Северна Македонија и начинот на кој му пристапи на тој предизвик. Мислам дека тоа што го видовме од Северна Македонија е дипломатско лидерство. Видовме лидери во Скопје како ги контактираат лидерите во Софија и видовме корисен дипломатски дијалог како резултат на тоа“, рече Купер.
Таа вели дека застојот во евроинтеграциите оди во корист на Москва, која „ќе настојува да ги влоши поделбите и да го попречи пристапот, без разлика дали тоа беше пред НАТО, што знаеме дека Русија се обиде да го спречи, и сега во ЕУ“.
Министерката Петровска, пак, смета дека предолгото тактизирање или одлагање на почетокот на преговорите, заради ветото кое го имаме од нашиот сосед, може да предизвика сериозен безбедносен проблем на Балканот, заради тоа што, на некој начин, веќе се чувствува фрустрација од предолгото чекање во овој процес и тоа е нешто што дополнително ја обесхрабрува и администрацијата и општеството во целина.
„Тоа тактизирање, особено во услови кои ги имаме сега на европско тло, а тоа е воената агресија врз Украина, остава простор за влијанија на трети држави кои, не секогаш, односно најчесто, не се добро наклонети кон состојбите. Поголема акција, поголема вклученост од сите страни ќе биде од бенефит за сите“, рече Петровска и изрази благодарност за континуираната и недвосмислена американска поддршка.
Во контекст на хибридните закани, Петровска порача дека е видливо нивно засилување, особено по почетокот на руската агресија врз Украина.
„Хибридните закани беа присутни во Северна Македонија и претходно, но со започнувањето на руската инвазија врз Украина и ставовите кои Владата ги има кон ова прашање, а тоа е јасна осуда и недвосмислена поддршка на Украина во оваа борба, тие се засилија кон институциите и се разбира кон одредени министри, политичари или, пак, јавни личности кои го изразуваат тој став“, истакна Петровска.
Министерката Петровска минатата недела во Вашингтон учествуваше на Стратешкиот дијалог меѓу двете земји, а оствари и низа средби во Стејт Департментот, во Пентагон и во Пенсилванија. За време на стратешкиот дијалог беше најавен американски грант од 40 милиони за модернизација на македонската Армија и за зголемување на заштитата од хибридни закани.