Иницијативнот одбор за ослободување на Томислав Кежаровски од притвор во пресрет на дебатата за Предлог -законот за медиуми ги повикува колегите новинари и преставниците на здруженијата, асоцијациите и другите медиумски организации да не учествуваат во дебатата.
-Сметаме дека во услови во кои колегата е во притвор од 28. 05.2013 поради напишан текст а мерката му се продолжува три пати по триесет дена, не треба да се дебатира за каков било закон кој се однесува на работата на новинарите и медиумите, соопштува Иницијативниот одбор за ослободување на Кежаровски од притвор.
Судењето на Кежаровски кое беше минатата недела (9.08) од репортерката на НОВА Сашка Цветковска, беше опишано како едно од најемотивните сведочења- она на новинарот Томислав Кежаровски. Неговата сопруга го слушаше Томислав внатре, а нивната ќерка чекаше вести надвор, бидејќи како малолетник не и беше дозволено да влезе во судницата за да го види татко си.
– Се соочувам со неразумниот каприц на правосудните органи, а јас само ја работев својата работа. Не е потребно човек да е правник за да примени здрав разум и логика и да ја сфати апсурдноста на обвинението против мене кое ми го наруши мирот и семејното спокојство, рече Кежаровски кој во неколку наврати не успеа да си ги сопре солзите.
Се пожали и на мерката притвор, иако судијата неколку пати го предупреди да не зборува за притворот бидејќи таа не била надлежна за тоа.
– Мерката притвор ќе ја окарактеризирам како крвничка. Секој ден доаѓаат луѓе во Шутка и по неколку дена ги пуштаат дома, но јас сум таму три месеци. Сега само што пуштија обвинет за убиство оти имал болки во увото. Се прашувам дали требаше да фатам пиштол во рака или нож или можеби да ја пљачкам државата за да добијам таков третман, рече новинарот.
На адвокатите на одбраната на два пати им беше забрането да му постават прашање на Кежаровски. Првото прашање гласеше „дали непосредно пред определувањето на притворот на Кежаровски му била упатена некаква непристојна понуда“, на што судијата експресно викна „се одбива, не може“. Потоа стана друг адвокат од одбраната и рече дека ќе го преформулира прашањето кое овојпат гласеше „дали сте примале закани во врска со овој случај“, на што судиите повторно нервозно одговорија дека овие и сите слични прашања не се одобруваат.
Неговиот адвокат Филип Медарски се пожали дека се уште не му бил одобрен увид во записникот, на што му се придружија и останатите адвокати кои тврдеа дека не им бил овозможен увид во сите докази. А обвинија и дека истражниот судија и обвинителката селектирано им ги дале материјалите од специјалните истражни мерки спроведени во 2009 година.
-Во многу наврати не се дадоа докази, не се даваа докази на увид, не ни се дадени ниту наредбите за посебни истражни мерки, односно следење на комуникациите за да видиме дали се спроведени законски, а еве само ќе ви кажам еден пример – најголем дел од спроведените мерки се снимки без аудио запис. Значи сама снимка кога двајца луѓе разговараат да се достави до судот како доказ без да има аудио запис за да се види содржината на разговорот дали е нешто противзаконски или не, тоа е апсурд, рече адвокатот Александар Тортевски.