Глувите по трет пат се обидоа да си ги побараат своите права и тоа на јубилејната прослава, 65 години од постоењето на Сојузот на глуви на РМ. Со транспаренти на кои пишуваше „Васко Марков оди си, не те сакаме“, „Марков врши трговија со луѓе“, глувите лица од цела држава се собраа пред Домот на АРМ каде се одржуваше прославата, каде беше присутен и Министерот за труд и социјала Диме Спасов. Тие побараа од Марков да излезе, да разговараат и да му ги соопштат барањата, но тој одби кога претставничката од Хелсиншки комитет го замоли да излезе. Министерот Спасов откако ја изгледа програмата си замина од другиот влез.
Глувите се револтирани од самоволието на Марков, лути се биејќи ниту еден преведувач не излезе од прославата за да им помогне во преведување, кога даваа изјави пред медиумите. Еден од нив, Џемаил Аземовски тврди дека заедно со неговите три деца, пред неколку дена бил нападнат од 13 лица, меѓу кои имало и глуви лица кои ги познава. Случајот е пријавен во полиција и во Хелсиншкиот комитет.
-За да ме смири претседателот Марков ми понуди работа како обезбедување, ми даде и покана за денешната прослава, кога одбив и си заминав, ги прати луѓето кои ме нападнаа на автобуска постојка во центарот на градот, јас се изгубив, а моите деца се трауматизирани, изјави Аземовски.
Глувите објаснија дека во Сојузот им се заканиле дека нивните апликации за огласот во Македонски шуми за инвалидизирани лица нема да бидат земени во предвид бидејќи протестираат.
Во исто време внатре во Домот на АРМ министерот Спасов од говорницата истакнал дека во последните години е подобрен квалитетот на животот на глувите.
-Унапредени се основните човекови права, се заложивме за афимација на знаковниот јазик, на социјалната заштита, комуникациски бариери и организиран спортски живот изјави министерот Спасов.