Премиерите на Вишеградската група (Унгарија, Полска, Словачка и Чешка) ќе се состанат во Прага во наредните денови за да дебатираат за бегалската криза, најави чешкиот премиер Бохуслав Соботка. Тој додаде дека овој вонреден самит ќе го отфрли предлогот на ЕУ за квоти бегалци кои треба да се распределат во земјите членки на ЕУ.
«Се надевам дека ќе усвоиме позиција во однос на европскиот предлог», рече тој додавајќи дека ќе биде потврдена одлуката за отфрлање на квотите. Тој смета исто така не треба да има надеж дека бегалската криза брзо ќе заврши и дека ниту една членка на ЕУ не може проблемот сама да го реши». Според него, потребно е решение на европско ниво.
Неговите колеги од Унгарија и Словачка најавија дека ќе дојдат на состанокот и се очекува потврда од полската премиерка Ева Копач за да се фиксира датум за средбата.
Словачкиот премиер Роберт Фико изјави денес дека неговата земја нема никогаш да се согласи со квотите бегалци. Тој рече исто така дека не може да ги прифати критиките за оваа словачка позиција кои доаѓаат од «земји кои не го прифаќаат влезот во Шенген на Романија и Бугарија».
Очигледно е дека оваа изјава се однесува на Германија и Франција кои во 2010 година не се согласија со влезот во Шенген зоната на Бугарија и Романија велејќи дека во овие две земји цутат организираниот криминал и корупцијата.
Минатата недела од Словачка дојде изјава во која се вели дека оваа земја може да прими бегалци но само ако тие се христијани. Премиерот за “Вашингтон Пост” изјави дека “Словачка не може да толерира бран на 300 до 400.000 муслимански мигранти кои ќе почнат да градат џамии насекаде и ќе се обидат да ја сменат природата, културата и вредносите на нашата земја”.
Во текот на изминатите денови повеќемина западни политичари ја критикуваат оваа позиција на источните земји на ЕУ за отфрлање на квотите. Шефот на француската дипломатија Лоран Фабиус изјави дека е «скандализиран» од источните земји на ЕУ и нивната позиција кон бегалската криза со која се отфрла предлогот за квоти за прием на бегалците во земјите на ЕУ.