За овие пет години покажав дека со работа, со труд, со чесност и искреност, се добива и се оправдува довербата на граѓаните, потенцира претседателскиот кандидат на ВМРО – ДПМНЕ, Ѓорге Иванов вечерва на митинг во Демир Хисар, искажувајќи благодарност што пред пет години, тие дале повеќе гласови за него, отколку за кандидатот на опозицијата.
– Се надевам дека и овој пат ќе биде исто, рече Иванов.
Довербата на граѓаните за овие пет години постојано растеше и првпат досега додека се мери довербата на институцијата Претседател, подвлече,има највисока доверба меѓу граѓаните. Дури 56 проценти од граѓаните имаат доверба во институцијата Претседател, но, рече,човек лично го исполнува некое чувство на самодоверба, кога гледа дека 74 проценти од граѓаните на Македонија, сметаат дека чесно сум ја обавувал функцијата Претседател.
– Недалеку од тука е Смилево, неодамна го посетивме. Родното место на Дамјан Груев. Не можеме а да не се потсетиме на неговите зборови дека само со сопствени сили можеме да се избориме за ослободување на Македонија. Затоа и во Смилево беше донесена Одлуката да се дигне востанието. На дел Илинден. Првиот Илинден беше борба за слобода, вториот Илинден беше борба за државност, третиот Илинден на 8-ми Септември 1991 година, беше ден кога ја освоивме битката за независна и суверена држава – Република Македонија. Сонот на илинденците, сонот на АСНОМ-ците. Остварувајќи го овој сон, добивме два завета: завети од нашите предци, кои сме должни да ги исполниме, Првиот завет беше дека да не дозволиме некој друг да одлучува за нас – без нас. Секогаш кога некој друг одлучувал, без да не праша, без да не консултира, се носеле кобни одлуки и се правеле штетни компромиси на сметка на Македонија и за македонскиот народ, говореше Иванов.