Претседателот на Македонија, Ѓорге Иванов, утре (21 септември 2015 година), ќе и ја додели титулата Национален уметник на Република Македонија на оперската пејачка Ана Дурловски.
Согласно извештајот доставен од Комисија за утврдување на национален уметник во состав: академик Катица Ќулафкова, академик Газанфер Бајрам, проф.м-р. Јана Андреевска, Оливер Белопета и Раде Силјан, двајца кандидати ги исполнуваа условите. Освен Дурловски, и поетот и преведувач Никола Маџиров беше во изборот за Национален уметник.
Признанието се доделува согласно Законот за Национален уметник на Република Македонија, а досегашни добитници на титулата се пијанистот, Симон Трпчевски, сценаристот и режисер, Милчо Манчевски, естрадниот уметник Есма Реџепова -Теодосиевска и оперскиот пејач Борис Трајанов.