„Одлуката на Европскиот совет за отпочнување преговори со Србија, заедно со комплетното интегрирање на Хрватска во ЕУ од 1 јули 2013 и започнатите преговори на Црна Гора со Унијата, ги демантираат домашните евро-скептици вклучително премиерот и државното раководство од ВМРО-ДПМНЕ и нивните теории за замореност од процесот на проширување“, изјави денес претседателот на ЛП, Ивон Величковски.
Величковски смета дека одложувањето на решавањето на клучните проблеми на патот кон членството во ЕУ – спорот со Грција, уредувањето на добрососедските односи со Бугарија и застојот во домашниот политички процес, заедно нефункционалното владеење на правото, политичкиот дијалог, заштитата на човековите права и слободата на медиумите е неодговорно решение.
Партијата на Ивон Величковски бара од ВМРО-ДПМНЕ и ДУИ да започнат меѓусебен дијалог и дијалог со опозициските партии за градење позиции и документи за решавање на овие отворени прашања, пред се низ постигнувањето консензус за истите во Собранието.
– Во спротивно, вели тој, може да очекуваме дека и следното „роуд-шоу“ на премиерот и министрите ќе биде проектирано во текот на декемврискиот самит на ЕУ, повторно на дестинација која не е Брисел.
Според лидерот на ЛП, со тоа би се потврдило дека владата нема политика за европска интеграција на Македонија, туку како што вели „само политика за оправдување на неуспехот за европска интеграција“.