ИЗБОРНА КАМПАЊА: Преглед на денот
Кандидатот на здружената опозиција за градоначалник на Центар Андреј Жерновски, го обвини неговиот противкандидат Владимир Тодоровиќ дека српските медиуми пишуваат за инвестиции во Србија, од пари кои ги зел од граѓаните на Македонија. “Се работи за големи суми пари, со злоупотреба на политичката позиција во власта”, вели Жерновски.
Тодоровиќ пак, ги демантираше ваквите обвинувања и понуди откажување од функцијата доколку Жерновски пред јавноста изнесе цврсти докази.
Денеска Државната комисија за спречување на корупција објави дека утврдила дека кандидатот за градоначалник од Сојузот за иднината, Андреј Жерновски криел имот, односно давал неточни и непотполни податоци за својот имот.
СДСМ пак, изјави дека кај Стевче Јакимовски, кандидат за градоначалник на општина Карпош, дното нема крај, а а да го покрие чинот на реваншизам и бркањето од работа на чуварот од општината Карпош, Ненад Куч, Јакимовски се обидувал да му намести афера дека за време на неговото дежурство бил украден телевизор од објектот „Влајко“
Јакимовски излезе со реакција за овие обвинувања од неговата претходна партија: “ Уште еднаш кажуваме дека Ненад Куч не е избркан од работа, туку не му е продолжен договорот за работа.Тој подолго време се однесувал „комотно“ и несовесно на работното место кое му е доверено “
ДУИ до петок ќе донесат одлука кого ќе поддржат во вториот круг избори, односно дали ќе ги повикаат своите гласачи да се определат за владејачката ВМРО-ДПМНЕ, нивниот коалиционен партнер, или пак за здружената опозиција, која ја преводи најголемата опозициона партија СДСМ.
“Се уште немаме одлука”, изјави за НОВА портпаролот на ДУИ Бујар Османи, кој додаде дека се очекува на два дена пред изборите веќе да се знае нивниот став, со чија поддршка евентуално би се решила и победата на кандидатот за градоначалник на Скопје- Коце Трајановски или Јани Макрадули.
Партијата на Руфи Османи, НДП, во вториот изборен круг ќе го поддржи кандидатот за градоначалник на Струга од редовите на ДПА, Зијадин Села. Се водат разговори и за другите општини на ниво на партиски ограноци.
НДП ја обвини ДУИ за изборен фалсификат на 24 март: “ Партијата на Ахмети изврши тешка манипулација на изборниот процес, преку масовно купување гласови, семејно гласање, заканување и заплашување на граѓаните од лица што се на раководни државни функции како и од државни инспектори преку казнени мерки кон гласачите”, соопшти НДП.