И овој ден помина во светло на партиските препукувања, а во центарот на вниманието повторно беа препирките помеѓу кандидатите за градоначалници на општина Центар, Владимир Тодоровиќ од коалицијата “За подобра Македонија” и Андреј Жерновски од “Сојузот на иднината”.
Жерновски реагираше на најавите на Антикорупциската комисија дека ќе поведе постапка против него порадни наводно непотполниот анкетен лист.
“Мојот анкетен лист секогаш бил уредно пријавен. Јас живем во стара куќа која е наследство од мојот дедо, а наредбодавачот купи четири стана за време на конфликтот кога Македонија крвареше,” рече Жерновски и посочо дека власта пред вториот круг врши силен притисок врз него и сите кандидати на опозицијата.
Во јавноста се појавија информација дека и Тодоровиќ го нема пријавено целиот свој имот и дека има фирма во Бугарија која недостасува во неговиот анкетен лист. Тодоровиќ прво изјави дека податоците на бугарскиот централен регистер се стари и неажурирани, за потоа писмено да соопшти дека таа фирма нема основачки влог, па затоа и не ја пријавил. На страницата на бугарскиот регистер, сепак, го пишува паричниот влог.
-Согласно Законот за спречување на корупција Член 34, обврска За пријавување промена во имотната состојба имаат избрани и наименувани лица само за секое ЗГОЛЕМУВАЊЕ НА ИМОТОТ во вредност што надминува износ од 20 просечни плати во претходниот три месечен период на ниво на држава.
Премиерот Никола Груевски во Струга ги повика сите граѓани да го поддржат нивниот заеднички кандидат со опозицијата д-р Владо Кочовски, чија главна цел, како што изјави Груевски, е овој мултиетнички град да го направи подобро место за живеење.
Груевски денес побара поддршка и од Дебарца.
– Време е и Дебарца да се приклучи на победничката коалиција, да влезе во побеничкиот табор, во побеничката екипа. Екипа која прави дела, екипа која гради, екипа која создава, екипа која решава проблеми Тоа е ВМРО ДПМНЕ и коалицијата за подобра Македонија, рече Груевски.
Лидерот на опозицијата Бранко Црвенковски се обрати од Кавадарци каде им порача на кавадарчани дека во недела треба да гласаат за себе и своите блиски, затоа што тоа, според него е најзначајната инвестиција. Според него, власта предводена од ВМРО-ДПМНЕ не се грижи за лозарството и придонела да се намали бројот на лозови насади.
– Во недела стартуваме со нула наспрема нула. Потребни ви се само 5 минути храброст за да ја донесете најважната одлука во вашиот живот од која подоцна нема да се срамите ниту пред самите себе, ниту пред вашите деца и блиски, рече Црвенковски.
Кампањата жестоко се води и во Велес. Кандидатот на опозицијата Аце Коцевски изјави дека во Велес за време на владеењето на ВМРО ДПМНЕ не била асфалтирана ниту една улица. ВМРО ДПМНЕ писмено возврати дека неговото деветгодишно владеење во Велес било вистинска пропаст за градот.
И денес, како и сите минати денови од кампањата, министри и функционери ги придружуваа кандидатите за градоначалници од владејачката коалиција во нивните промотивни изборни активности.