Во Галерија МКЦ, вечерва ќе биде отворена изложба на избрани дела од Иван Велков. Тој е “уметникот кој ги кршеше академските сфаќања за сликарството во 60те години на минатиот век и дел од авангардното сликарство во Македонија и Југославија”, пишува во каталогот за изложбата
Иван Велков и’ припаѓа на повоената генерација уметници. Роден, 1930 година во Врање. Дипломира на Академијата за ликовни уметности во Белград, оддел сликарство.
Во историјата на македонската ликовна сцена е забележан како автор на препознатливи дела со експресионистичка, кубистичко-конструктивистичка, геометриска и лирска апстракција.
Во 1954 година се зачленува во Друштвото на ликовните уметници на Македонија. Шест години подоцна, со колегата Петар Мазев ја оформуваат познатата ликовна група “Мугри”. Многу пати изложува во Македонија, и во Европа, и пошироко. Триесетина години е професор на Архитектонскиот факултет во Скопје.
Велков почина во Скопје на 25 мај, 2008 година на 78-годишна возраст.
Куратор на изложбата е академскиот сликар Горјан Ѓорѓиев.
Изложбата на дела од Велков во Галерија МКЦ ќе е отворена до 18. мај, по што следи изложбата на дела на Костадин Танчев – Динката.