Утре со почеток во 20 часот во просториите на Арт клубот „Ку Ла“ во Скопје, самостојна ликовна изложба ќе одржи тетовскиот уметник Славчо Максимовски.
На изложбата, насловена како,Лицата во пределот на пеколот и рајот“, ќе бидат изложени околу 15 дела работени во графичката техника сува игла во комбинација со монотипија, како и дела работени во техника масло на платно.
Во склоп на овој настан ќе се одржи и промоција на краток експериментален филм со наслов ,,Круг“, во режија на Глигор Кондовски и Славчо Максимовски. Улогите ги толкуваат: Тања Бучковска, Елзана Чековиќ и Марко Видачек.
Максимовски е дипломиран графичар на Факултетот за „Хумани науки“ и уметност при ДУТ во класата на проф. Нафи Јашари. Тој е член на драмската и уметничката секција при Здружението за Култура и Уметност ,,Иљо Антески –Смок“ Тетово, работел и како сценограф за модерен балет, и како член на Драмското студио играно во претставите ,,Приказната на големиот господар,“ ,,Смртта на еден човек на балканот“ и ,,Биолошки динамит“.