Отворање на изложбата „Скопје Heartbeat” од Дороти Пачкова, утре во 20 часот во просториите на галерија Ко-Ра, Кочо Рацин, Дом на градежници.
„Скопје Heartbeat” е изложба на фотографии од градските графити кои нудат пораки кои се позитивни, поттикнуваат на родова еднаквост, љубов кон животот и надеж кон подобар свет.
Целта на оваа изложба е да разбуди асоцијација на секојдневните, вообичаени нешта кои го прават животот поподнослив, а сите ние на нив забораваме низ трката со животот и преоптовареноста со овој материјален свет. Тука се пред носот на секој од нас ама треба да ги отвориме срцата за сетилата да можат да ги забележуваат простите радости на градов.
Дороти Пачкова се опишува себе како уметница, активистка, жена, мајка и основачка и претседателка на Граѓанското здружение „Една може“.
Изложбата ќе трае до 13 септември.