Денеска во 17 часот во малата сала на Галерија „Ко-ра“во ЈУДом на култура „Кочо Рацин“- Скопје, ќе биде отворена првата самостојна изложба на Александра Арсовска.
Овој циклус насловен „Јас имам сон и ќе го остварам“ е инспириран од урбани моменти од секојдневието, од жанр сцени, а настанат е во период од последните неколку години по завршувањето на факултетот.
На оваа изложба ќе бидат претставени избор од 20 -тина фотографии, колор и црно бели. Нејзиниот свет кој го разоткриваме преку фокусот на фото објективот ни ја доловува нејзината природа која е спонтана, неоптоварена и непосредна, помалку и загадочна во едноставноста на комуникацијата и дијалогот со светот кој ја опкружува.
„Токму тој привид на безначајните и неважни нешта кои добиваат значење и поистоветување со секојдневието на една урбана култура се спонтан предизвик за одбраните кадри на Александра Арсовска кои некаде добиваат значење на една филмска естетика во која се преклопуваат личното, индивидуалното, урбаното, секвенци од природата, материјализацијата на природните елементи песокот, водата, движењето со моменти дополнети со семејно интимно опкружување“, ќе рече Виолета Калиќ на отварањето на изложбата.
Александра Арсовска е родена во Скопје 1992 година. Претставник е на помладата генерација автори, Дипломирала на Европски Универзитет, во класа професор Гордана Вренцоска, која и е ментор и на нејзината дипломска работа на одделот за графички дизајн.
Учествувала во повеќе манифестации, како и во повеќе групни изложби на „Европски Универзитет“ во Скопје,а 2018 година учествува на мултикултурната изложба на група од 55 ликовни уметници од Македонија во „Студиефорбундет“во Малме, Шведска. Нејзина преокупација подолг период е фотографијата.