Во Малта беше реализирана изложбата под наслов „Тоа сум Јас…“ на авторот Хари Дудески од Македонија, а на покана на Форумот за Демократска Македонија.
Изложбата ја отворија заменик министерот за култура Владимир Лазовски и пратеничката Мери Лазарова.
Хари Дудески е уметник, сликар, графичар и дизајнер кој работи изминатите 25 години во Македонија, со оваа изложба во Малта претстави концепт на визуелизација на знамето преку моментумот со кој се соочува Македонија во годините на воспоставување на државност, транзиција и финализација, преку 12-те варијанти, асоцијација 12-те месеци во една година. Низ промена на сегментите на знамето, како круцијален симбол во еден идентитет, изложбата е приказ на препознатливоста во тој македонски идентитет како и чувството на припадност во тоа себепрепознавање низ годините кои се живеат во нам познатите околности.
Воедно, ова гостување на претставниците на Владата и Собранието во Малта беше искористено и за средба со дел од членовите на ФДМ, како и претставници на други македонски заедници кои функционираат на островот, во апсект на продлабочување на соработката со македонските институции во време кога во Малта сè уште не е отворено Дипломатско-конзуларно претставништво.
