Годишниот извештај за напредокот на Македонија (и другите земји од Балканот како и Турција) и “пакетот за проширувањето на ЕУ”, ќе бидат објавени со една недела задоцнување. Тоа значи дека комесарот за преговори за проширување Јоханес Хан ќе ги објави на 21 октомври а не на 14 октомври како што беше предвидено.
Според портпаролот на комесарот причината лежи во самитот на ЕУ посветен на миграцијата кој се одржува идната недела во Брисел. Европската комисија смета дека овој самит и жешката актуелност на бегалската криза ќе го свртат целото медиумско внимание кон овој состанок на највисоко ниво и многу малку простор ќе остане за Балканот и неговите проблеми на патот кон ЕУ.
“Ова е прв ‘пакет за проширување’ на новата Јункер Комисија. Пакетот за прв пат содржи среднорочна стратегија а извештаите за земјите ќе имаат поинаква презентација а не како досега. Претседателот Јункер и целиот колеџ на комесари се многу заинтересирани овој пакет да го привлече вниманието на медиумите и јавноста како што заслужува. Во тој контекст, а со оглед на одржувањето на самитот на ЕУ идната недела кој ќе биде посветен на мигацијата, сакаме пакетот да го презентираме една недела подоцна за да обезбедиме достојно внимание од страна на медиумите и јавноста”, изјави портпаролот на Хан.