„Ако имав вина, ниту јас, ниту моето семејство немаше да може да го издржиме овој притисок со кој се соочуваме повеќе години наназад, туку ќе признаев и ќе се молев за помала казна. Но, бидејќи јас немам никаква вина, стојам исправен пред вас, пред целата јавност, за да докажам дека немам никаква улога во овој немил настан, изјави поранешниот министер за транспорт и врски, Миле Јанакиески во завршните зборови за случајот „Шамари во Центар“.
Изменетото обвинение за предметот „Шамарите во Центар“ пред давањето на завршните зборови, според обвинетиот поранешен министер Миле Јанакиески го дискриминира бидејќи нема еднаквост на оружјата.
Во него, според неговата одбрана, тој, наместо како член на Извршниот комитет на ВМРО-ДПМНЕ е наведен како близок соработник на бившиот премиер Никола Груевски.
„Пред само три работни дена беше претставено новото обвинение. Пред кого да докажувам дали сум или не сум бил близок соработник на Никола Груевски или дали сум истакнат член на ВМРО-ДПМНЕ или не”, изјави попладнево во Основниот кривичен суд поранешниот министер за транспорт и врски, Миле Јанакиески.
Тој тврди дека, според податоците од СЈО, има над 80 000 прислушувани разговори од него и во завршните зборови посочи дека во јавност се објавувале селектирани „бомби” во последните пет години, а со тоа се стигматизирал неговиот лик и била создадена перцепција дека е насилник, криминалец, терорист, а сето тоа „влијаело пред време да биде осуден во јавноста.“
Во завршни зборови тој посочи дека поради бегството на Груевски, сега цената ја плаќа тој.
„Факт е дека откако Груевски не е присутен во Македонија, голем дел од медиумскиот и политички притисок е врз мои плеќи, затоа против мене се водат осум постапки и секој ден сум на суд. Дали е потребно да се најде жртвено јагне за да се понесе одговорноста за нечии постапки?”, запраша Јанакиески.
„Рангелова е ослободена, Лазаров призна вина, Груевски си замина и што останува? Миле Јанакиески да биде огласен за виновен за некој да може да поентира дека победила правдата”, изјави поранешниот министер за транспорт и врски.
Според обвинението, Јанакиески се товари за поттикнување на насилството на протестите пред општина Центар во јуни 2013 година.