На никој насилно нема да му биде одземен имот, а сите постапки кои ќе се преземат во врска со земјиштето во Љубаништа ќе бидат исклучиво согласно законските прописи, истакна денеска министерот за транспорт и врски Миле Јанакиески.
Ова е одговор на изјавата на митрополитот Дебарско-кичевски Тимотеј дека црковното земјиште во Љубаништа не е на продажба, во контест на најавената инвестиција на „Сахар груп“.
„Доколку има земјиште на црквата ќе ги почитуваме сите законски прописи и на никој нема да му биде одземен имот како што и досега оваа Влада нема одземено имот, без да се даде определен надомест“, рече министерот за транспорт и врски Миле Јанакиески.
„Согласно законот, туристичката развојна зона е од јавен интерес и кога некоја област се урбанизира за јавен интерес се води постапка за експропријација така што нема насилно на никого да му одземаме имот, туку при реализацијата на стратешките проекти како што се туристичка развојна зона, изградба на автопат, железничка пруга или гасовод, ќе ги почитуваме законските прописи во државата. Сите потстапки кои ќе се преземат ќе бидат исклучиво согласно законските прописи во Македонија“, нагласи Јанакиески.