Шукар рат пралален тхај пењален (добра вечер браќа и сестри), со овие зборови на вчерашниот митинг им се обрати кандидатот за претседател на држвата Ѓорѓе Иванов на жителите на Шуто Оризари. Тој им се заблагодари за извојуваната победа над својот противкандидат Стево Пендаровски.
„Единствено во оваа општина имаме победа над Пендаровски со пет спрема еден. Се надевам дека и во вториот круг ќе ја имам вашата подршка“, додаде Иванов.
Гордана Јанкуловска носителот на изборната единица 2, вели дека посакува победата на Иванов со разликата од пет спрема еден да се повтори и во недела па да слават двојна победа. Таа додаде дека граѓаните на Шутка ќе ја дадат својата подршка за ВМРО ДПМНЕ и нема да подлегнат на провокации како што беше случајот со потпретседателката на СДСМ, Радмила Шеќеринска која намерно провоцирала и сакала да се прекинат изборите во првиот круг. Тоа не се случи а нема да се случи ни во недела, ќе имаме фер и демократски избори, кажа Јанкуловска.
„Ромите во недела ќе гласаат за инвестиција за изградба на фекална канализација, за пуштање во употреба на ново средно училиште во Шуто Оризари, за санација на кровот на основното училиштето „Браќа Рамиз Хамид“ и изградба на спротска сала, за изградба на 51 социјален стан до 2018 година во Шуто Оризари, за подобрување на водоснабдувањето во Шуто Оризари, за нови народни кујни и за проширување на правната помош за ромската заедница“, кажа Јанкуловска.
Амди Бајрам лидерот на политичката партија СРМ, рече дека повеќе Ромите нема да бидат јаничари, како што ги користеле во времето на владеењето на СДСМ.
„Во недела Иванов ќе има 30 проценти повеќе гласови од претходните избори, а Пендаровски нема да има ниту 500 гласа“, додаде Бајрам.
Премиерот Никола Груевски рече дека постојано работеле напорно да се подобри состојбата на ромската популација, во сите сегменти, од здравствено и социјално право, вработување. Тој најави дека во иднина ќе отвореле работни места и во околината на општината Шуто Оризари, каде што ќе се вработат голем број на невработени Роми.
На вчерашниот митинг специјално беше донесена да ги забавува граѓаните бугарската пејачка Џулија Бикова.