Предлог уставните измени од владејачката ВМРО-ДПМНЕ, со кои се бара прецизирање на бракот како заедница меѓу маж и жена не е никаква дискриминација, туку политика која значи заштита на вредностите на општеството, изјави министерката за внатрешни работи Гордана Јанкуловска во интервју за Прес24.
„Не гледам како предлогот би можел да води кон нетолеранција и дискриминација. Јас не го спорам правото на СДСМ да има исти ставови со ЛГБТ заедницата, но моите ставови и ставовите на ВМРО-ДПМНЕ се различни. Јас не се сложувам со легализирање на истополовите бракови или давање можност да посвојуваат деца и тоа јасно го кажувам. Додека ВМРО е на власт бракот ќе биде заедница исклучиво меѓу маж и жена“, вели Јанкуловска.
Околу инцидентите во Скопската чаршија каде што беше нападнат ЛГБТ центарот за поддршка, Јанкуловска вели случајот се третира како и сите други, преземени се сите мерки и поднесен е Посебен извештај за расветлувањето на случајот.
Инаку, на почетокот на месец август, владејачката ВМРО-ДПМНЕ ја информираше јавноста преку својот пратеник Влатко Ѓорчев, дека доставиле до Собранието предлог за измени во Уставот, според кој бракот се дефинира исклучиво како заедница помеѓу еден маж и една жена. Со тоа, ВМРО-ДПМНЕ, во рамките на Уставот планира да ја вгради можноста посвојување на деца да им биде дозволено исклучиво на заедница составена од родители од различен пол, како и од самохрани родители.