Покрената финансиска истрага против лидерот на опозицијата во Словенија, Јанез Јанша, врз основа на Законот за конфискација на имот, стекнат на незаконски начин.
Како што пишува љубљански „Дневник“, истрагата покрената од специјалното обвинителство, ги вклучува и полицијата, даночната управа, уредот против перење пари и антикорупциската комисија, како и имотот на поранешниот Премиер на Словенија вреден 640.000 евра, во недвижнини и автомобили, во периодот од 2000 година до октомври оваа година.
Се истражува и имотот на братот на Јанша, Рајко, сопругата Уршка и нејзината внука Наташа Пајенк, за која постои сомневање дека располагала со сметките на Јанша.
Во истата финансиска истрага е вклучен и имотот на Јоже Загожен, поранешен истакнат член на партијата на Јанша, која заедно со него на првостепениот суд во Љубљана беше осуден на казна затвор и парична казна во корупциската афера „Патриа“, кој во меѓувреме почина, а на чие име во австриските банки се откриени 271.000 евра, наведува весникот.