„Утре вечер Советот на општината ќе ја одржи првата вонредна седница. Ќе биде на отворено, за да можат граѓаните да ги слушнат ставовите на советниците. Досега советничката група на ВМРО-ДПМНЕ не ја слушнавме дали ќе ги штити интересите на жителите или политиките на Груевски“ соопшти денеска Игор Алаџајков, координатор на Советничка група на СДСМ при Општина Центар.
Во текот на вчерашниот ден советниците на ВМРО-ДПМНЕ не одговараа на телефонските повици, и денеска им се испраќаат покани за седницата. Ги повикуваме и јавно да дојдат утре вечер на седницата на Советот, рече Алаџајков.
Тој истакна дека со ДУП-овите на виделина излезе вистината, дека протестот и дивеењето пред општината Центар не биле спонтани, туку организирани, и дека не беше како што велеа, за одбрана на црквата, туку да се спречи носењето на новите ДУП-ови, за да може и натаму да продолжи дивеењето на урбаната мафија и да се работи против интересите на граѓаните на општина Центар.