Во јавниот сектор во земјава заклучно со 31 декември лани биле вработени 132.088 лица во 1.346 институции. Повеќе од половината имаат најмалку високо образование. Споредено со лани, има околу 900 вработени повеќе. Намалување за околу 600 лица има во органите на државната власт. Најголем дел вработените во јавниот сектор работат во образование. Просечната старост на вработените е 46 години.
Ова го покажала анализата на Годишниот извештај за вработените во јавниот сектор за 2021 година што денеска на прес-конференција ја презентираше министерот за информатичко општество и јавна администрација Адмирем Алити.
Интересно е тоа што од вкупниот број вработени, 19.311 лица работат во АРМ, МВР, АНБ, Агенцијата за разузнавање и Управата за финансиска полиција и за нив како што рече Алити, поради специфичноста на дејностите не се презентираат подетални анализи. На анализи се подложени останатите 112.777 вработени во јавниот сектор.
-Она што е за истакнување е дека бројот на вработените на државната власт претставува само 13 отсто од вкупната бројка на вработените во јавнит сектор, односно од вкупно 132.088 вработени во јавниот сектор, во Владата, министерствата, ораганите во нивен состав, органите на државната управа, се вработени 15.302 лица, рече министерот.
Во 2021 е зголемен број лица со високи образовни кфалификации, односно повеќе од половината од вработените во јавниот сектор имаат намалку високо образование. Од нив 4.753 се магистри и 2.575 се доктори на науки.
Од Извештајот може да се види дека поголем број од вработените или 55,3 отсто се жени, а 44,7 отсто мажи. Просечна возраст на вработените во јавниот сектор е 46 години. Во однос на етничка припадност на ниво на цел јавен сектор Македонците се застапени со 73,57 проценти, Албанците со 20,35, Турците со 1,95, Ромите 1,19, Србите со 1,07 проценти.