Комесарот за преговори за проширување вечерва доаѓа во Скопје каде што утре ќе учествува на Високиот политички дијалог помеѓу Европската комисија и македонската Влада.
Пред поаѓање за Скопје, Хан го поздрави именувањето на специјалната обвинителка и тоа во договорениот рок иако одлуката паднала во пет часот на наутро.
“Ова е прв важен чекор и доказ дека Комисијата одблиску ги следи настаните и дека ќе ги набљудува идните чекори. Тоа е важен чекор за политичка нормализација на земјата и но приказната не е завршена”, рече комесарот.
НОВА: Со оглед на фактот што одлуката за специјалниот обвините беше донесена во последен момент, можете ли да кажете дали тоа именување беше направено со голема пресија од Брисел и Вашингтон или пак партиите успеаа сами да дојдат до договор?
Хан: Можам само да кажам дека ние го олеснивме овој дијалог и во тоа успеавме. Конечно сите партии се согласија и успеаа да дојдат до договор.
НОВА: Не би било изненадување за никого во Македонија доколку специјалната обвинителка се соочи со притисоци и заплашувања од страна на политичките партии. Дали Европската комисија има гаранции дека обвинителката ќе може својата работа да ја врши без притисоци?
Хан: Време е да почнеме да градиме доверба. Она што имаме намера да го направиме јас не би го нарекол гаранции. Но можам да кажам дека ќе бидеме таму за да следиме многу сериозно и внимателно да набљудуваме.
Во меѓународната заедница постои интерес и внимание кон она што се случува. Доказ за тоа меѓународно внимание е и овој Висок политички дијалог што треба да се одржи утре. Јас редовно го известувам Советот на министрите за надворешни работи на ЕУ за се што се случува кај вас а тоа значи дека меѓународното набљудување веќе е присутно.
НОВА: Дали за Македонија се оддалечува опасноста од губење на препораката за преговори за членство во ЕУ како што тоа беше случај во текот на политичката криза?
Хан: Не можам да кажам каков ќе биде нашиот конечен предлог. Таа работа е во тек. Но тоа е дел од целата дискусија: Дека без договорот од јули и без примената на сите точки од договорот, земјата ќе се најде во слепа улица. Досега можам да констатирам дека договореното се остварува. Опозицијата се врати во Собранието, специјалниот обвинител е назначен и барам од сите да работат со доверба, доверба едни во други.