На утрешниот мини-самит во Брисел посветен на бегалската криза и на кој беа поканети Србија и Македонија, можен е договор според кој земјите ќе се обврзат да не ги пуштаат бегалците во соседната земја доколку тоа не биде претходно договорено со соседот. Таквата политика за ЕУ не е прифатлива, вели предлогот на Европската комисија кој утре ќе биде на масата на самитот.
Ова денес го пишуваат германските медиуми. На утрешниот самит не се повикани сите земји членки на ЕУ туку само оние кои имаат најмногу проблеми со бројот на бегалците на нивните граници како Австрија, Бугарија, Хрватска, Германија, Грција, Унгарија, Романија и Словенија.
Овој предлог што го објавуваат германските медиуми е дел од 16те мерки кои претседателот на Европската комисија Жан-Клод Јункер им ги испратил на земјите членки поканети на мини-самитот.
Според Шпигел и Франкфуртер Алгемајне Цајтунг земјите треба да прифатат «да престанат да дозволуваат движење на бегалците кон границата на друга земја доколку нема договор со таа земја».
Според агенцијата АФП, Јункер вчера, за Функе-Медиагрупе, изјави дека германската канцеларка Ангела Меркел не треба да ја менува својата политика на прием на бегалците поради лошите анкети на јавното мислење кои тврдат дека нејзиниот рејтинг опаѓа.
Во Германија има се повеќе незадоволство поради политиката на Меркел кон бегалците а такви има се повеќе дури и во нејзините сопствени редови. Германија најави дека очекува помеѓу 800.000 и милион бегалци во 2015 година.
Според планот на ЕК кој беше договорен помеѓу земјите членки во септември, 160.000 бегалци треба да се поделат помеѓу земјите. Но, ЕК вчера рече дека досега земјите членки предложиле места за само 854 бегалци што е разочарувачки резултат.
Јункер во интервјуто го повтори слоганот на Меркел кој гласи «Мораме да успееме!» и рече дека тоа треба да биде слоганот на цела Европа.
Меѓународната организација за миграции објави вчера дека во Грција пристигнале 48.000 бегалци во последните пет дена. Тие доаѓаат преку Турција.
Анкара побара од ЕУ да ги исполни сите свои ветувања за помош. Во ветувањата се наоѓа помош од три милијарди евра но исто така ветување дека ЕУ ќе ги обнови преговорите со Турција за членство во ЕУ кои се под мраз. Анкара очекува остварување на ветувањето пред да почне да го применува планот кој треба да ги намали бројот на бегалци кои одат кон ЕУ.
Во Брисел се шпекулира дека извештаите за напредок за земјите од Балканот и Турција беа одложени токму поради значајната улога на Турција.