По написите во медиумите дека немало средба во Загреб помеѓу Ѓорге Иванов и Карoлос Папуљас, македонскиот и грчкиот претседател, туку само неформален разговор за време на вечерата, и наводното демантирање од страна на грчкиот претседател, како што пренесе Канал 5, екипата на НОВА побара коментар од Кабинетот на претседателот.
>> На Иванов не му оди со колегите – немало средба со Папуљас
Во одговорот од Кабинетот на Претседателот на НОВА информираат дека Претседателот Иванов останува на изјавата дадена вчера во Загреб.
„Не станува збор за официјална средба, од тие причини не беше лиферувано соопштение од Кабинетот на Претседателот“, велат за НОВА оттаму.
На новинарско прашање – Дали имал можност да разговара со колегата од Грција, претседателот Иванов даде потврдна изјава. Впрочем, од Кабинетот на грчкиот претседател не демантираат дека имало разговор меѓу двајцата претседатели.
Претходно, извори за Канал 5 од претседателската палата изјавиле дека за време на вечерата Иванов му пришол на Папуљас, размениле 2 збора, го поканил да пијат кафе, на што грчкиот претседател одговорил – ќе пиеме, но откако ќе се решат проблемите. Според извор на Канал 5 официјална Атина не пуштила ниту соопштение бидејќи не станало збор за официјална средба, туку за неформален разговор на вечерата.