Платите на вработените во управата во Македонија се за 14,5 отсто повисоки од просечните во земјата и гледано на ваков начин тие се на исто ниво како и во Словенија, а повисоки од Хрватска и од Црна Гора, која е единствена држава до поранешна Југославија каде платите во управата се пониски од просечните и тоа за 3 отсто.
Платите во македонската државна управа во однос на просечните се пониски од оние во Србија и БиХ, каде што нивното ниво изнесува 20,2 отсто и 37,5 отсто над просекот респективно, покажува компаративната анализа на белградскиот портал Макроекономија.
Од друга страна, пак, во Македонија платите во здравството се на претпоследно место во однос на просечните. Платите во здравството во земјава се за 5,1 отсто повисоки од просечните, но тие се на претпоследно место споредено со другите екс-ју држави освен Црна Гора. Највисоки плати во однос на просечните имаат здравствените работници во БиХ и тоа за 26,1 отсто.
Кога станува збор, пак, за образованието, платите во земјава се дури и пониски од просечните и тоа за 1,4, а пониски плати во однос на просекот има и во Црна Гора и во Србија. Највисоки плати во однос на националниот просек имаат словенечките просветни работници при што нивните плати се за 8,3 отсто повисоки од просечните.
Македонија убедливо најмалку вработени на 1.000 жители има во здравството и тоа само 17,5. Најмногу има Словенија со дури 26 вработени здравствени работници на 1.000 жители. И како процент од вкупниот број на вработени, оние во здравството во Македонија се меѓу најмалубројните во екс-ју. Во земјава само 7 отсто од вработените работат во здравството и тоа е најниска бројка, со исклучок на Црна Гора, каде само 6,6 отсто од вработените работат во здравството. Најмногу вработени во здравството како процент од вкупниот број на вработени има во Србија – 11,9 отсто.
Македонија е претпоследна и кога станува збор за бројот на вработени во образованието како процент од вкупниот број вработени. Само 8,4 отсто од вработените се просветни работници. Помалку од нас има Црна Гора со 8,1 отсто, а најмногу има Србија со 10,2 отсто.
Фондот на плати во образованието во земјава изнесува 8,7 отсто од вкупниот, а во здравството само 7,7 отсто до вкупниот. Овие проценти се втори најниски меѓу земјите на поранешна Југославија само пред Црна Гора. Највисок фонд на плати во образованието како процент од вкупниот платен фонд има во БиХ со 10,2 отсто, а во здравството Србија со 12,8 отсто.