Цело Мислешево од најстаро до најмладо излезе да го поздрави доаѓањето на нивниот сограѓанин победникот на првото издание на Икс Фактор, Даниел Кајмакоски. На влезот од селото стоеше транспарент „Добредојде наше сонце“, а за што поубав пречек на Кајмакоски имаше и торта на која беше испишано неговото име и насликано македонското знаме.
Поради големиот интерес локалниот превозник пушти вонредни автобуски линии од Струга до Мислешево, а и полицијата имаше работа бидејки на влезот од селото и во него го регулираше сообраќајот. Кајмакоски одржа получасовен концерт на кој испеа дел од песните со кои настапи на популарното шоу. Најбројни беа најмладите кои бараа да се фотографираат со него и да добијат автограм. Мислешевци не паметат кога последен пат толку многу народ се собрал среде село. Велат дека ниту на митинзите на партиите во Мислешево до сега не дошле толку многу луѓе. Му порачуваат на Кајмакоски да не се меша во политиката и дека би било добро да не пее на митинзите на некоја од политичките партии.
„Партиите не може да соберат толку многу народ како што собра Даниел. Мислам дека не би му требало да прифати да пее на митинзите на некоја од партиите ако добие такви понуди,“ вели жителка на Струга.
„Ова е голем настан не само за Мислешево туку и за цела Македонија, затоа што Даниел го поддржуваше цела Македонија,“ вели жителка на Струга.
„Дојдовме да го пречекаме Даниел, кој е мој сограѓанин и комшија. Ова е многу добар настан за нас, дури многу поголем од актуелните на политички план. Само вакви победници треба да пречекуваме. Никогаш по никој повод не се случило толку многу народ да има на едно место во Мислешево. Ова досега е најголемо нешто,“ вели жител на Мислешево.
Кајмакоски вели дека во неговиот план за сега не стои настап на митинзите на некоја од партиите во Македонија кои се длабоко во кампања.
„Тоа за сега не стои во моите планови. Јас сакам повеќе Македонија да ја поддржувам со хуманитарни концерти, работи кои се добри за народот, за сите луѓе. Не сум добил се уште официјална понуда за пеење за некоја партија но мислам дека и нема да бидам тука. Примарно ми е сега да направам што повеќе и да заминам што подалеку и секогаш да кажам дека сум Македонец,“ рече Кајмакоски.
На прашањето на НОВА дали би прифатил да пее за некоја политичка партија, Кајмакоски рече дека се би дал да не прифати. Вели дека многу работи што се зборувале за него во јавноста не биле точни.
„Мислам дека ова е еден од најемотивните моменти во мојот живот бидејки знаев дека ќе биде вака. Повеќе трема имав да дојдам дома отколку да настапам во финалето на Икс Фактор каде бев многу опуштен. Во Мислешево се наоѓаат моите луѓе, пријатели и роднини. По враќањето во Белград каде веќе изнајмив стан почнуваме да работиме интензивно на мојата кариера по што да излезе првиот сингл и видео клип. Се надевам дека некоја од песните на мојот албум ќе биде и од Жељко Јоксимовиќ. Морам да кажам дека цел живот го чекав ова,“ вели Кајмакоски.
Даниел кажа дека не се чувствува како победник и оти победата треба да ја оправда.