Пред споменикот на Даме Груев во Смилево околу стотина членови на ,,Бугарскиот културен клуб” ја прославија 110-годишнината на Илинденското востание.
Во оваа прилика, претседателот на Клубот Лазар Младенов изјави дека македонските бугари биле дискриминирани.
– Нема ниту еден пројавен Бугарин, а да не е изложен на говор на омраза, заплашување, испуштање од работа, па дури на судски прогони- рече Младенов, пренесува ТВ Алфа.
– Да се почитуваат правата на сите граѓани. Тие што сакаат да бидат Македонци, нека бидат Македонци. Тие што сакаат да бидат Бугари, нека бидат Бугари- рече Красимир Каракачанов од ВМРО СМД.
За учесниците на собирот, според нивната реторика и изјави, можеше да се чуе за заеднички корени, заедничка историја, па дури и за заеднички историски вредности.
И оваа прилика беше искористена за спомнување на заедничката историја на Македонија и Бугарија, при што Даме Груев беше нарекуван како еден од најголемите бугарски патриоти.
Бугарскиот претседател Росен Плевнлиев испрати поздравно писмо до организаторите на собирот.
Во писмото Плевнелиев потсетува дека речиси три месеци меѓу Црно Море и Охридското Езеро 26 илјади востаници водеа нерамноправна борба со многукратно побројниот противник. „Овој “повик за човечко сочувство и за правда на целиот цивилизиран свет”, како што го дефинира хроничарот на востанието Христо Силјанов, му докажа на светот дека Бугарите во Македонија и Одринско дораснале за својата слобода. Ете зошто нивното дело засекогаш остави длабок печат во нашата свест и национален идентитет.
Ја користам приликата да ги поздравам напорите на БККС за сочувување и популаризирање на општото историско наследство и разбирање меѓу Република Бугарија и Република Македонија. И покрај потешкотиите, вашата дејност ќе продолжи да дава богати плодови во насока на надминување на предрасудите и зближување на населението од двете страни на границата“, напиша Плевнелиев, претседателот на Република Бугарија.