Карл Билт загрижен за иднината на Македонија
Шведскиот министер за надворешни работи, Карл Билт е позагрижен за Македонија отколку за било која било друга земја соочена со политичка криза во регионот. Ваквата загриженост тој ја искажал во интервју за телевизијата Ал Џезеира за време на неговиот престој деновиве во Загреб. Во интервјуто Билт оценил дека моменталната состојба во нашата земја е неодржлива и дека постои ризик таа да се влоши уште повеќе ако наскоро не се најде решение во спорот за името со Грција и за внатрешните проблеми, особено посочувајќи ги настаните околу 24 делември.
„Тоа ќе влијае на Македонија, но може да има последици и за регионот. Тоа значи дека моментално сум повеќе загрижен за долгорочната ситуација во Македонија отколку за ситуацијата во која било друга земја во регионот“, рекол Билт во силна „конкуренција“ на кризите во БиХ и таа околу Србија и Косово. Според него, оваа состојба бара меѓународен ангажман, покрај тој на медијаторот на ОН, но подразбира исто така лидерите на Скопје и на Атина да бидат во состојба да преземат неопходни чекори околу спорот.
Изјавата на Билт е илустрација на алармот во меѓународната заедница за испреплетување на кризите во регионот, и тоа повеќе од границите на Западниот Балкан. Освен проблемите во Македонија, Филе има комплексни проблеми во Албанија во која на 23 јуни треба да се одржат парламентарни избори за кои двете водечки партии водат рововска битка, а како трета по сила се очекува да се пласира фашистичката Црвено-црна алијанса чија програмска определба е референдум за обединување на Албанија и Косово. Бугарија ја тресе „вотергејт скандал“ во чиј центар е експремиерот Бојко Борисов и неговата влада, откако лидерот на социјалистите непосредно пред изборите на 12 мај објави дека биле прислушувани од власта претседателот на државата Росен Плевнелиев, еврокомесарката Кристалина Георгиева, Ахмед Доган, Иван Костов, Георги Прванов и други функционери.
Преговорите меѓу Србија и Косово во медиумите беа прокоментирани како „последна рунда на неуспех“, додека Грција се соочува со опасен пораст на популарноста на радикалните партии и е под притисок да ја забрани Златна зора за да не се најде во Парламентот или во власта.