Членки на католичка женска група запалија факели со розов чад на ридот зад Ватикан во знак на протест против родовата нееднаквост во Црквата, неколку часа пред кардиналите да се соберат на конклава во Сикстинската капела за избор на нов папа.
„Додека светот чека бел или црн чад, нашиот розов чад сигнализира дека жените треба да бидат вклучени во секој аспект од животот на Црквата, вклучително и во конклавата“, изјави Кејт МекЕлви, извршна директорка на Конференцијата за ракополагање жени.
Жените истакнаа дека во минатото биле приведени кога своите протести ги приближиле до плоштадот Свети Петар, па затоа овој пат розовите факли ги запалиле на ридот Џаниколо зад Ватикан, од каде што се гледа куполата на базиликата Свети Петар.
„Исклучувањето на жените од конклавата и од ракоположената служба е грев и скандал“, додаде МекЕлви. Тие носеа список со потенцијални кандидатки за папа, меѓу кои и поранешната претседателка на Ирска Мери МекАлис.