Припадници на нигериската исламистичка група Боко Харам киднапираа неколку лица во северен Камерун, меѓу кои е и сопругата на камерунскиот вицепремиер Амаду Али. Грабнат е и локален верски лидер, кој е градоначалник на градот Колофата.
Како што соопшти претставникот на камерунската армија, полковник Феликс Нџи Формекон, членовите на Боко Харам ја преминале нигериско-камерунската граница и го нападнале пограничниот град Колофата во северен Камерун.
„Луѓето на Боко Харам се‘ уште се во градот и водат борби со нашите војници, изјави Формекон.
Тој соопшти дека сопругата на вицепремиерот Али била киднапирана од нивниот дом заедно со домашните помошнички. При нападот, телохранителите успеле да го извлечат и вицепремиерот Али од домот, каде со семејството го прославувал Рамазан Бајрам, и да го пренесат во соседниот град Мора. Формекон истакна дека при судирите во Колофата сигурно има и загинати и ранети, но дека засега нема податоци за конкретни бројки на жртви.
Извор: Дојче Веле