Се зголемуваат листите на чекање во болниците низ државата. Пациентите со месеци чекаат за обично снимање на рентген, за колпоскопија или на ехо апарат. За обична операција на жолчка на Клиниката за абдоменална хирургија се чека од два до четири месеци велат лекарите.
Пациентите се револтирани. Велат дека системот на закажување не е добар бидејќи болеста напредува, а додека чекаат тешко се справуваат со болката.
Хирурзите се жалат дека бројот на операции им е ограничен бидејќи Фондот за здравство им ги ограничува буџетите на болниците. Така секој на хирург во просек може да оперира двајца до тројца пациенти неделно. Другите пациенти се принудени да чекаат или пак се задолжуваат, земаат кредити за да можат да се оперираат што побргу во некоја од приватните болници.
Според податоците до кои дојде НОВА само за операции од областа на абдоменалната хирургија во приватните болници годишно се слеваат 1,5 милиони евра.
-Тоа се огромни срества кои ги заштедува Фондот, а од друга страна пак, секое зголемување на обемот на работа на јавното здравство носи загуба на болницата вели професорот Милчо Пановски абдоменален хирург.
Од Фондот за здравствено осигурување велат дека висината на буџетите се определува според остварувањето на вкупната вредност на здравствените услуги во предходната година.
Јавните здравствени установи се самостојни во вршење на својата дејност и се должни да им пружат целосна квалитетна здравствена услуга на пациентите.
-Тие се самостојни во одлучувањето како ќе ги распоредат буџетите со кои располагаат и како ќе ги планираат видот и обемот на услугите. Рационалното, максимално ефикасно и ефективно користење на буџетите е одговорноста на менаџерите на болниците се вели во писмениот одговор од ФЗОМ.
Од друга страна директорите се жалат дека фондот им ги ограничува буџетите поради што се принудени да прават помалку интервенции. Она што е најконтрадикторно е што лекарите работат по учинок, проект во кој треба да се такмичат што повеќе интервенции да сработат, а од друга страна ограничен им е бројот на операции.
-Бројот на операции ни е ограничен, а работиме по учинок. Она што ургентно треба да се направи е да се зголемат буџетите на болниците вели за НОВА очниот хирург Дејан Ставриќ.
Неговата листа за чекање е долга, а за да дојдат на ред пациентите за операција кај доктор Ствриќ треба да чекаат цели шест години. Во таква ситуација најчесто се откажуваат и се принудени да одат во приватните болници каде операција на око чини и до 3000 евра.