Според проценките на аналитичарите во банките на Кипар се наоѓаат меѓу 15 и 20 милијарди евра од руски фирми. Потеклото на овие пари не е познато во целост.
„Овој процес на извлекување на Кипар од должничката криза треба да се искористи кипарските банки да се принудат да бидат потраспарентни. Сметам дека не е во ред банките во еврозоната да бидат искористувани од руските инвеститори и нивните финансиски трансакции кои не се чисти. Мора да го расчистиме тоа еднаш”, изјави Марија Жоао Родригез, професор на Институтот за европски студии во Брисел и советник на голем број на европските институции.
Во изјавата се додава дека сега е неопходно европските институции да испратат јасен сигнал дека овие мерки нема да ги загрозат малите штедачи.
„Мислам дека треба да се стави јасно до знаење дека ЕУ има утврдено прецизен и јасен принцип за заштита на луѓето со заштеди до 100.000 евра. Тоа принцип јасно беше поставен по 2008-та како една од мерките за справување со финасиската криза”, вели Родригез.
Кипар ги чека бараните 10 милијарди евра заем од ЕУ и Меѓународниот монетарен фонд.
Еден од условите е дека сметките на заштедите помалку од 100.000 евра да се оданочуваат со стапка од 6,75 проценти, а над таа линија по стапка од 9,9 проценти.
Со став и претседателот на Русија, Владимир Путин. Според него ова се „непрофесионални и опасни мерки“ за „принудните наплати на банкарските депозити“, пренесува Ројтерс.
Тој утрово свика итен состанок во Москва на кој се разговарало за изнаоѓање решение за финансиската состојба во Кипар, кој за да спречи финансиски банкрот на банките има намера да земе по 10 отсто од штедните влогови, од кои добар дел се на руски државјани.
Според проценките на Мудис, руските банки на крајот на 2012-та година имале околу 12 милијарди долари пласирани на Кипар и корпоративни депозити во износ од 19 милијарди долари.