Ретко кога една ќерка употребува жестоки зборови опишувајќи го својот татко.
Енџи Грег, ќерката на Ариел Кастро, човекот осомничен за киднапирање на три жени кое траело околу една деценија, го опишува својот татко како „најзлобниот, демонски криминалец“.
„Тој е мртов за мене“, вели Грег во интервју за CNN, нагласувајќи дека таа својот татко го знаела како „пријателски настроен, грижлив човек“. Денес таа не сака да го види.
„Никогаш повеќе нема да го посетувам, нема да му се јавувам“, вели таа. „Тој никогаш повеќе нема да биде Тато за мене“.
Кога за првпат слушнала на вести за киднапирањата, Енџи Грег вели дека посакала веднаш да „потоне во земја“. Таа ги познавала Бери и де Хесус од нејзините школски денови.
Секогаш кога одела во посета кај својот татко (кој бил разведен со мајка и), Кастро се задржувал доста долго време пред да и ја отвори вратата, се сеќава Енџи.
Вратите секогаш биле заклучени. Неа ја внесувал од задната врата, не допуштајќи и да влезе преку главниот влез на куќата.
Од време на време, тој исчезнувал од вечерата без никакво објаснување за неговото отсуство.
Подрумот секогаш бил заклучен.
Како што вели таа никогаш не била малтретирана од нејзиниот татко, ниту пак нејзините сестри. Но, тие биле сведоци како тој ја тепал нивната мајка, Гримилда Фигуероа, која Кастро ја обвинувал дека го мамела со соседите.
„Сум го гледала како буквално ја гази мојата мајка, како таа да беше машко“, раскажува за CNN, Енџи Грег.