Ненад Јовановиќ: Го слушнав Мицкоски во популарниот подкаст кај Лазаров. Некој може да ми рече, што е проблемот, мазохиста ли си станал, црни Ненаде? И нема да биде во криво.
Три часа таква еклектика, таков бучкуруш, такво тртлање од шупље-во-празно и обратно, што сега ми доаѓа во леѓен со врела вода да испирам синуси. Ми ги затна бронхиите ова бездушно интервју.
Само еден пример ќе дадам: завршил факс како инжинер, а направил пари како бизнисмен. Настрана што во неговата животна приказна има купишта “дупки” и се гледа дека очајно ја ретушира сопствената биографија која е спорна на милион прашања, туку во моментот друго ми е зборот:
Сите што се во ВМРО се со дипломи и никој не работи по професијата, сите или се бизнисмени или татковците им оставиле имот, a овие се пикнале во политика. Па уште и’ ни продава “македонски сон”, премиерот.
Кој сон, која црна иднина, кои реформи, кутар ти човеку.
Ако ова им е најдоброто “животно искуство”, ако ова е историјата на првиот човек во Влада, и ако на ваков начин премиерот го ретушира сопственото минато, Македонци, вие сте, нема да ве лажам – опасно отруени, некреативни, очајни, штом на вакво “животно искуство” сте му дале безмалку 2/3 пратеници.