Новата Европска комисија (ЕК) на Жан-Клод Јункер на пладне доби зелено светло од Европскиот парламент за да започне со работа на 1 ноември. Парламентарците ја одобрија новата ЕК со 423 гласа “за”, 209 “против” и 67 воздржани. Конечното зелено светло треба да го дадат лидерите на ЕУ на самитот кој на крајот на оваа недела се одржува во Брисел.
Најголемиот број на проддршката за новата ЕК дојде од редовите на демохристијаните, социјалистите и либералите. Партијата на зелените и радикалната левица гласаа против а групата на Европски конзервативци и реформисти беа воздржани.
Во својот говор пред гласањето новиот претседател на ЕК Јункер најави неколку чекори кои од него ги бараше ЕП. Така, портфељот на културата ќе му биде доделен на Гркот Димитрис Аврамопулос а не на Унгарецот Тибор Наврашчич, близок од унгарскиот премиер Виктор Орбан. Унгарецот ќе биде задолжен за спорт во новата ЕК.
Потпредседател на ЕК ќе биде Холанѓанецот Франс Тимерманс кој е социјалист и кој ќе треба да биде еден вид гарант за портфељот на енергија и клима, шпанскиот комесар Мигуел Ариас Кањете кому ЕП не му покажа голема доверба поради неговите врски со нафтената индустрија.
Јункер се обврза исто така дека ќе инвестира 300 милијарди евра за економијата. Новиот претседател вети дека дека неговата ЕК ќе биде помалку технократска и повеќе политичка од претходната на Баросо. Освен тоа, Јункер им рече на пратениците дека ќе се врати на одлучување во кое ќе биде асоциран ЕП кој повеќе нема да биде орган за “кревање рака” на одлуките на владите на земјите членки. Според Јункер, “ова е Комисијата на последната шанса”.
Зборувајќи за проширувањето и критиките дека овој портфељ го доби името “преговори за проширување” наместо само “проширување”, Јункер рече дека не се согласува со оваа забелешка. Според него, отфрлањето на зборот “преговори” ќе донесе илузии кај земјите кандидати за членство. Јункер смета дека во наредните пет години, додека тој ја води ЕК, нема да има нови проширувања на ЕУ но ќе може да има преговори за членство.