Членовите на Комисијата за образование и наука не издржаа ни половина час од почетокот на својата работа денеска по што претседателката Олга Најденовска даде 5 минути пауза.
Имено, работата како и на претходните емисии застана на Деловникот на работа. Откако Најденовска ја отвори денешната седница, процедурално се јави за збор координаторот на пратеничката група на СДСМ – Горан Сугарески кој порача дека опозицијата нема да дозволи да не се работи според Деловникот.
Сугарески побара да се тргне точката за предлог-одлука за ограничување на дискусија, која за нив е спорна, а за владејачката партија, според Сугарески ја сметала за веќе донесена одлука.
-Пратениците имаат право да зборуваат колку сакаат. Проценката за амандманите дали се многу или малку никој нема право да каже. Деловникот на ниеден основ не можете да го кршите, а вие сакате да донесете нови правила врз основа на мнозинство. Во 2013 сами го донесовте овој Деловник и еднаш ако не се почитува, утре може да се крши при работата и на други комисии, вели Сугарески.
Според него, ако ваквиот начин на работа поминел, бидејќи мнозинството на Комисијата го има владејачкото мнозинство, ќе се направи преседан.
Собранието на 28. јануари со мнозинство гласови во прво читање го поддржа предлог-законот за основање универзитет за национална одбрана, безбедност и мир „Дамјан Груев“.
Планирано е во рамки на универзитетот да функционираат осум факултети: Воена академија, Воздухопловна академија, Факултет за безбедност, Медицински факултет, Факултет за мировни студии и кризен менаџмент, Правен факултет, Институт за командни и штабни функции и лидерство и Институт за информатички технологии и сајбер безбедност, од кои поголем дел треба да почнат со работа во академската 2016/17 година.