Атина: Со четиричасовен прекин на работата од 9:30 до 13:30 часот по локално време, Управниот одбор на Асоцијацијата на контролори на летање на Грција ги повика своите членови да учествуваат во 24-часовниот штрајк што за в четврток го закажа Синдикатот на вработените во јавниот сектор.
За време на четиричасовниот прекин со работата се очекува да се создадат проблеми во авионскиот сообраќај од и кон Грција, со оглед на тоа што ќе бидат дозволени само одредени летови за покривање на основните потреби на општеството.
Поконкретно, дозволени ќе бидат: летови кои прелетуваат над ФИР Атина (грчкиот воздушен простор); летови кои превезуваат шефови на држави и премиери; летови на грчкото воено воздухопловство, кои учествуваат во оперативни мисии и планирани вежби; летови на авиони кои се соочуваат со невообичаени околности или се во вонредна состојба; медицински летови, летови со хуманитарна помош, како и летови на авиони за потрага и спасување.