Државната корејска развојна банка (Korea Development Bank) ја преименува својата филијала во Унгарија во KDB Bank Europa и има намера да ја користи како база за експанзија во регионот, извести поранешната KDB Bank (Magyarország) за унгарската агенција MTI.
Банката сака да отвори филијали во 11 земји на Балканот и Источна Европа меѓу кои и во Македонија до 2018 година. Другите земји во кои ќе бидат отворени филијали се: Словачка, Чешката Република, Австрија, Романија, Молдавија, Србија, Хрватска, Украина, Русија и Грција.
Првата филијала во Братислава ќе биде отворена веќе за неколку недели, изјавуваат од Банката за унгарската агенција, а пренесува „Budapest Business Journal“.
Инаку, унгарскиот контролор на финансиските пазари, PSzÁF, ја казни оваа банка со 10 милиони форинти (34.550 евра) зашто ги пренесувала трансакциските трошоци на клиентите преку воведување на нова давачка. PSzÁF ѝ нареди на Банката да ја прекине оваа активност и да им врати на клиентите износи од десетици милиони форинти.
Унгарскиот PSzÁF за истиот прекршок врши истрага врз повеќе финансиски институции во земјата.
Korea Development Bank e основана во 1954 година за да ги финансира и да управува со големите индустриски објекти, а со цел да се забрза индустрискиот развој и да се засили националната економија. Таа е најголема банка за проектно финансирање во Азија и на пацифичкиот регион, а е и лидер на домашниот пазар на капитал. Банката помага и во управувањето со компании загубари преку корпоративно реструктуирање и консултантски услуги и обезбедува капитал за стратешки регионални развојни проекти. Таа има 40 домашни деловници, а во странство има седум банки ќерки, пет филијали и две претставнички канцеларии, преку кои обезбедува комплетни финансиски услуги. Вработува над 2.100 лица.