Македонија почна со пораз во претквалификациите за Светското кошаркаско првенство во Кина во 2019 година. Косово ги совлада „црвено-жолтите“ со 72:68 во првиот меч во групата Ц за внесување на максимална неизвесност за првите две позиции на табелата кои водат во наредната фаза за мундијалот.
„Шлаканицата“ за македонските кошаркари дојде како последица на бледата игра во првото полувреме. По двете четвртини Косоварите имаа дури 20 поени разлика (40:20) што навестуваше можен дебакл на фаворизираниот состав на Јорданчо Давитков. Продолжението мина во знак на Македонија, но будењето беше задоцнето, а поразот неизбежен.
Бериша со 28 коша беше најефикасен во мечот во кој Косово ја архивира првата победа во историјата. Џордан Теодор, пак, ја предводеше листата на стрелци во поразената селекција со 22 поена. Војдан Стојановски уфрли 17, двоцифрен беше и Тасовски со 11.
Македонија веќе во сабота ќе има шанса за поправен против Естонија во Скопје.
Косово – Македонија 72:68
По четвртини: 23:11, 17:9, 15:23, 17:25. Сала: „Палата на млади и спорт“ во Приштина. Гледачи: 2.500. Судии: Петар Обрадовиќ (БиХ), Борис Шулга (Украина), Николас Сомос (Грција).
Косово: Кастрати 8, Весели, Г. Ругова 12, Бериша 28, Хајризи, Зенелај, Зекиќи, Сина, Шоши 4, Морина 5, Ф. Ругова 11, мекај 4. Селектор: Бред Гринберг.
Македонија: Николовски 7, Јаневски, Мекиќ 2, Костовски 4, В. Стојановски 17, Пенов 0, Тасовски 11, Шуроски 0, Брчков, Чековски 5, Теодор 22, Младеновски. Селектор: Јорданчо Давитков.
Кошарка/претквалификации за СП 2019
Група А
Ерменија – Словачка 75:61
Шведска – БиХ 81:73
Група Б
Албанија – Австрија 51:79
Група Ц
Косово – Македонија 72:68
Група Д
Португалија – Бугарија 71:82