Перо Антиќ, поранешниот капитен на македонската кошаркарска репрезентација е избран за нов претседател на Кошаркарската федерација. Апсолутно мнозинство од присутните делегати со право на глас на денешното редовно собрание на Федерацијата, кое воедно беше и изборно, се изјаснија за Антиќ.
Од 29 присутни делегати, 26 имаа право на глас.
Владимир Темелковски, кој првично се пријави во трката за претседателското место, ја повлече кандидатурата, а досегашниот претседател Петар Наумовски воопшто не конкурираше за нов мандат.
– Со одличен тим, добра стратегија и добра програма се надевам дека постепено ќе ја вратиме кошарката каде што заслужува. Во управниот одбор ќе вклучиме луѓе од бизнис секторот, професионалци, од спортскиот дел и сите заедно да работиме за доброто на кошарката. Наш приоритет ќе бидат младите, враќање на навивачите во салите, заживување на кошарката, враќање на оптимизмот, издигнување на А-селекцијата на повисоко ниво, каде што сме биле по можност и чекор понапред, изјави новиот прв човек на македонската кошарка по изборот.
Делегатите, меѓудругото, едногласно ја усвоија одлуката на Управниот одбор за промена на називот од МКФ, во Кошаркарска федерација на Северна Македонија. Собранието е во тек.